Friday, 13 September 2013

ആകാശ മിഠായി

കൂട്ടുകാരന്റെ മകളുടെ പേര്
മഴയാണെന്നറിഞ്ഞപ്പോൾ
മനസ്സ് തെളിഞ്ഞു
സാറാമ്മായുടെയും കേശവൻനായരുടെയും
സങ്കടം
വൈകിയാണെങ്കിലും പരിഹരിക്കപ്പെട്ടല്ലോ

വംശ മുദ്രയില്ലാത്ത
ജാതി മുദ്രയില്ലാത്ത
ജീവജാതികൾക്കെല്ലാം മീതെ
തുല്യമായ ഉത്സാഹത്തോടെ
പെയ്തിറങ്ങുന്ന മഴ
ആദ്യമായൊരുവളുടെ പേരായിരിക്കുന്നു 

മഴ പോലെ നല്ലൊരു പേര്
എത്രകാലം കൂടിയിട്ടാണ്‌
ഒരു പെണ്‍കുട്ടിക്ക് കിട്ടിയത്?
കുഞ്ഞായിരിക്കുമ്പോഴേ
അവൾക്കു പേരായി
മഴയ്ക്കുമുണ്ടാകില്ലേ കൊതി
വീടായി കുടുംബമായി കഴിയാൻ
നാട്ടിലെത്താനും വീട്ടിലെത്താനും
ഓർമ്മിപ്പിക്കുന്ന ചുമതല
കാലങ്ങളായി വഹിക്കുന്നതല്ലേ,
അടച്ചിട്ട വാതിലിനു പിന്നിൽ
ജന്മത്തിനു പിന്നിൽ എന്ന പോലെ
ഏറെ കാലം ക്ഷമയറ്റ് നിന്നതല്ലേ,
പഴുത് കിട്ടിയപ്പോഴൊക്കെ
അകത്ത് കയറി നോക്കിയതല്ലേ.

ഇനി മഴ
കുട ചൂടി
കൈയ്യിൽ പുസ്തകങ്ങളുമായി
മുറ്റത്ത്‌നിന്നേ അമ്മേ എന്ന് വിളിച്ച്
വീട്ടിൽ കയറിച്ചെല്ലും    
പൂച്ചയും അമ്മയും
വാതിൽ തുറന്ന്
അവളെ അകത്തേക്ക് കൂട്ടും.
മഴ
മഴയായപ്പോൾ
എവിടെയെല്ലാം എത്തി?
തോട് ചാടിക്കടന്ന് മഴ വരുന്നു 
മഴ ചമ്രം പടിഞ്ഞിരിക്കുന്നു
മഴ ചോറുതിന്നുന്നു
മഴ കൈ  കഴുകുന്നു 
മഴ മഴയത്ത് തുള്ളിച്ചാടുന്നു
ഓട്ടോയിൽ കയറുന്ന,
ഓടിത്തുടങ്ങിയ ബസ്‌ പിടിക്കാനാകാതെ
മുഖം വീർപ്പിച്ച് മടങ്ങി വരുന്ന
വെച്ച് കുത്തിയതിന്റെ വേദന മാറും വരെ  
കുമ്പിട്ടിരിക്കുന്ന
ക്ലാസ്സിലടങ്ങിയിരിക്കാത്ത
ചിരിച്ച് കുഴയുന്ന
പ്രേമിക്കുന്ന
കൊട്ടുവായിടുന്ന
ഉച്ചയായിട്ടും മൂടിപ്പുതച്ചുറങ്ങുന്ന മഴ.
മഴയ്ക്ക്
മാറാത്ത ജലദോഷമുണ്ടെങ്കിൽ
പേരിന്റെ ദോഷമാണെന്നു പറയുമോ വൈദ്യർ?
ചോർച്ചയടച്ചിട്ടെന്താ
മഴ വീടിനകത്തല്ലേ
എന്ന് കളിയാക്കുമോ പ്ലംബർ?
എണ്‍പതെഴുപത് വർഷം നീളുന്ന മഴ
എന്നാരെങ്കിലും മൂക്കത്ത് വിരൽവെക്കില്ലേ?
ഓ, മഴയെത്തി 
എന്ന് ചിരിച്ചാർക്കില്ലേ മഴയുടെ സഹപാഠികൾ
(മണ്ണ ട്ടയും  തവളയും കാറ്റും ഇലയുമായിരുന്നു
മുൻപ്അവളുടെ സഹപാഠികൾ)
ഒരു വീട്ടിൽ മാത്രം മഴ
എന്ന് പിറുപിറുക്കുമോ അയൽപക്കം?
നശിച്ച മഴ എന്ന് ശപിക്കുമോ
കുശുമ്പും കുന്നായ്മയും?
മഴ എന്ന് കേട്ട പാതി കേൾക്കാത്ത പാതി
ആരെങ്കിലും കുട നിവർത്തില്ലേ?
അവളാക്കുട
ചിരിച്ചു തള്ളുമോ?

മഴേ,
നീ വെയിലിന്റെ കൂടെയോ
കാറ്റിന്റെ കൂടെയോ
മിന്നലിന്റെ കൂടെയോ
ഉലയുന്ന മരങ്ങളുടെ കൂടെയോ
പ്രായമാകുമ്പോൾ പോകുക?

പ്രായമേറുന്തോറും
മഴയ്ക്ക് മഴയെ ഇഷ്ടമല്ലാതാകുമോ? 
പെണ്ണിന് മാത്രം പറ്റുന്ന പേര്
പുറത്തിറങ്ങാൻ വിടാത്ത പേര്
താണിടം പറ്റിക്കിടക്കുന്ന പേര്
അല്പം കൊണ്ടും മടുക്കുന്ന പേര്
എത്ര നല്ല പേരുകളാണ്
ആ പേരുകാർ മാത്രമായി
അവരുണ്ടാക്കുന്ന നീരസം മാത്രമായി മാറുന്നത്
മഴേ,
നീയങ്ങനെയാവരുതേ.   

'ആകാശ മിഠായി' : കല്പറ്റ നാരായണൻ 

                   (ചിത്രത്തിൽ : നക്ഷത്ര, അന്നൂർ)

അന്വേഷണം

(ജയ്പൂർ 'ഹവാ മഹലിനു' പുറത്തു നിന്നുള്ള ഒരു ഫോട്ടോ)
 

Thursday, 29 August 2013

സ്നേഹത്തിന്റെ മറ്റൊരു ദിനത്തിന് ധന്യവാദമർപ്പിക്കുമ്പോൾ

"സ്നേഹിക്കുമ്പോൾ ആഗ്രഹങ്ങൾ ഉളവാകുന്നുവെങ്കിൽ, 
ഇവയായിരിക്കട്ടെ നിന്റെ ആഗ്രഹങ്ങൾ:
ഇരവിനോട് അഭിരാമഗീതം പാടിയൊഴുകുന്ന അരുവിയായി അലിയുവാൻ 
അതിവിലോലതയുടെ വേദനയെന്തെന്നറിയുവാൻ,
സ്നേഹത്തെ കുറിച്ചുള്ള ആത്മബോധത്താൽ വ്രണിതമാകുവാൻ
അങ്ങനെ സ്വന്തം ഇച്ഛയാൽ സന്തോഷപൂർവ്വം രക്തം ചിന്തുവാൻ.

ചിറകാർന്ന ചിത്തത്തോ
ടെ പുലർവേളയിലുണർന്ന്, 
സ്നേഹത്തിന്റെ മറ്റൊരു ദിനത്തിന് ധന്യവാദമർപ്പിക്കുവാൻ,
മധ്യാഹ്ന വിശ്രാന്തിയിൽ, സ്നേഹത്തിന്റെ നിർവൃതിയെ പറ്റി ധ്യാനിക്കുവാൻ,
സായന്തനത്തിൽ കൃതജ്ഞതാനിർഭരനായി വീടണയുവാൻ
പിന്നെ പ്രിയപ്പെട്ടവൾക്കായി, ഹൃദയത്തിൽ ഒരു പ്രാർത്ഥനയും 
ചുണ്ടത്തൊരു അപദാനഗീതവുമായി ഉറങ്ങുവാൻ"              

ഖലീൽ ജിബ്രാൻ - 'പ്രവാചകൻ'
(പരിഭാഷ - കെ ജയകുമാർ)

Sunday, 18 August 2013

രാജസ്ഥാൻ

കത്തുന്ന സൂര്യനെ മനസാ വരിക്കാനായി ഉത്തരേന്ത്യൻ സ്ത്രീകൾ
കടും വർണ്ണങ്ങളെ പ്രണയിക്കുകയാണെന്ന് ചിലപ്പോൾ
 തോന്നാറുണ്ട്.

മഞ്ഞയുടെയും ചുകപ്പിന്റെയും ഉത്സവമേളം തീർത്ത്
ലെഹംഗയും ചോലിയും ധരിച്ച് 
ഉരുകിയൊലിക്കുന്ന വെയിലിൽ
നിസ്സംഗം നടന്നു നീങ്ങുന്ന ഇവരെ കാണുമ്പോൾ 
നിശ്ചലമായ ഒരു തടാകത്തിൽ നിലാവിൽ ഒഴുകി നടക്കുന്ന
അരയന്നങ്ങൾ പോലെ തോന്നും.

രാജസ്ഥാനിൽ ഇതുവരെ ഒറ്റത്തവണ മാത്രമേ പോകാൻ പറ്റിയിട്ടുള്ളൂ, 
ആദ്യ കാഴ്ചയിൽ തന്നെ
രജപുത് അംഗനമാരുടെ ജയ്പൂർ
കടും നിറങ്ങൾ കൊണ്ട് മനസ്സ് കീഴടക്കിക്കളഞ്ഞു.

ജോധ്പൂരും ജയ്സാൽമീറും മോഹിപ്പിച്ചു കൊണ്ട് ഇപ്പോഴും ബാക്കി നിൽക്കുന്നു.

(ചിത്രങ്ങൾ - ജയ്പൂർ രാജാ മാൻസിംഗ് കോട്ടയിൽ നിന്ന്) 

Wednesday, 31 July 2013

കുളിക്കാലം

എന്തായാലും മഴ ഇത്തവണ ഒട്ടും മോശമാക്കിയില്ല,
കഴിഞ്ഞ തവണ കുറഞ്ഞു പോയതിന്റെ വാശിയിൽ
തകർത്തങ്ങ് പെയ്യുകയാണ്.


ഇടവത്തിൽ കൃത്യമായെത്തി പതിഞ്ഞ താളത്തിൽ തുടങ്ങിയ മഴ
കർക്കിടകം പകുതിയാകുമ്പോഴേക്കും ഭൂമി മലയാളത്തെ
അങ്ങ് സ്നേഹിച്ച് വീർപ്പുമുട്ടിക്കുകയാണ്.


മഴക്കാലമെന്നാൽ നാട്ടിലെ ബാല്യത്തിന്
ചിറകളിലെ കുളിക്കാലം കൂടിയാണ്, 
തകർത്തു പെയ്ത കർക്കിടക മഴയിൽ
നാടൊട്ടുക്ക് അമ്പലക്കടവുകളും ചിറകളും നിറഞ്ഞു കവിഞ്ഞു.



വടക്കൻ മലബാറിൽ മുക്കിന് മുക്കിന് കാവുകളും ക്ഷേത്രങ്ങളുമാണ്
മിക്കയിടത്തും ചിറയോ കുളമോ ഉണ്ട് താനും
ഒരിടത്തും വൈകുന്നേരങ്ങളിൽ ആളൊഴിയുന്നില്ല.


 പകലിരുളുമ്പോൾ കുളക്കടവുകളിൽ
നീന്തൽ പിള്ളേരുടെ ആരവമാണ്. 

സ്കൂളിൽ പോയി തുടങ്ങിയ പൊടികൾ തൊട്ട്
പ്രായമായവർ വരെ വൈകുന്നേരമായാൽ 
കുളക്കടവുകളിൽ ഹാജർ.



ക്യാമറ കണ്ടാൽ അഭ്യാസങ്ങൾ ഒന്നൂടെ ഉഷാറാകും
സൂചി കുത്തും തിരിഞ്ഞു ചാട്ടവും
സുഹൃത്തിന്റെ തോളിൽ കയറി
നീട്ടി വലിഞ്ഞുള്ള  മലക്കം മറിച്ചിലും കൊഴുക്കും.



 ഉണക്ക തേങ്ങ കെട്ടിയും ട്യൂബിട്ടും 
എന്തിനു പ്ലാസ്റ്റിക്ക് കുപ്പികളിൽ കയറിട്ട് ചേർത്തും
നീന്തൽ പഠനത്തിന്റെ ആദ്യാക്ഷരങ്ങൾ കുറിക്കുന്നതും
ഇവിടെയൊക്കെ തന്നെ. 


വെള്ളത്തിൽ  കളിക്കുമ്പോൾ  സമയം പോകുന്നതറിയില്ല,
അല്ലെങ്കിലും മഴക്കാലത്ത് വേറെ എന്ത് കളിക്കാനാണ്?
 സ്കൂൾ വിട്ടെത്തിയാൽ ഒരു തോർത്തുമെടുത്ത്
നേരെ കുളത്തിലേക്ക് തന്നെ.  


അഭ്യാസം കാണിക്കാൻ മുതിർന്നവരും മോശമല്ല
കുളത്തിനു നടുവിൽ മിനുട്ടുകളോളം മലർന്നു കിടന്നു പോസ് ചെയ്ത ശേഷം
ഒടുവിൽ ഫെയിസ്‌ ബുക്കിൽ പോസ്റ്റ്‌ ചെയ്യാൻ ഫോട്ടോ അയച്ചു തരേണ്ട
ഇമെയിൽ അഡ്രസ് പറഞ്ഞു തരാനും മറക്കുന്നില്ല ഇവർ.


തൃക്കരിപ്പൂർ ചക്രപാണി ക്ഷേത്രക്കുളത്തിൽ നിന്നുള്ള
ചില മഴക്കാല ചിത്രങ്ങൾ

Wednesday, 24 July 2013

നാലു മണിപ്പൂവ്


മഴയോട് കിന്നരിച്ച്,
അഞ്ചു മണി നേരത്ത്.  

Thursday, 18 July 2013

പകിട


കളിയും കാര്യവും  - രണ്ട് ജയ്പൂർ ചിത്രങ്ങൾ
(രാജാ മാൻസിംഗ് കോട്ടയിൽ നിന്ന്)

Saturday, 13 July 2013

മാസ്റ്റർ

ഇക്കഴിഞ്ഞ ജൂൺ മാസം,
മഴ കോരിച്ചൊരിയുന്ന ഒരു വെള്ളിയാഴ്ച,
മൂന്നു കൂട്ടുകാരോടൊത്ത് പറശ്ശിനിയിൽ പോയതായിരുന്നു.
മടപ്പുരയിൽ ചായ കുടിക്കാനിരിക്കുന്ന ഹാളിന്റെ മുകളിൽ ഒരു മിന്നായം പോലെ കണ്ടതേ ഉള്ളൂ,
ഞങ്ങൾ ഓടി ചെന്നു കയറി നോക്കുമ്പോൾ
നിറഞ്ഞു ചിരിച്ചു കൊണ്ട് അവിടെ ഇരിക്കുന്നു,
മഹാനടൻ! 
 ഒറ്റ കാഴ്ചയിൽ തന്നെ ഞങ്ങളെ തിരിച്ചറിഞ്ഞു.
കൈ പിടിച്ച് അടുത്തിരുത്തി വിശേഷങ്ങൾ ചോദിച്ചു.
കോടതി ഉത്തരവ് പ്രകാരം രണ്ടാഴ്ചയിലൊരിക്കൽ മടപ്പുരയുടെ ഭണ്ഡാരം തുറക്കുമ്പോൾ
മാഷിന്റെ സാന്നിധ്യം വേണമത്രെ.
നിരീക്ഷകനായി വന്നതാണു.
 പഴയ ഹൈസ്കൂൾ ക്ലാസ്സിൽ ഷേക്സ്പിയറായും വേർഡ്സ് വെർത്തായുമെല്ലാം
നിമിഷാർദ്ധം കൊണ്ട് ഭാവപ്പകർച്ച സംഭവിക്കുന്ന
ചൈതന്യവത്തായ ആ മുഖം
അല്പ നേരം നീണ്ട കുശലാന്വേഷണത്തിനിടെ
അരണ്ട വെളിച്ചത്തിൽ നോക്കിയിരുന്നു.
 
 ഒരു മാറ്റവുമില്ല, എല്ലാം പഴയതു പൊലെ തന്നെ.
കേൾവി മാത്രം കുറവുണ്ട്‌.,
പക്ഷേ ധിഷണ ഇപ്പോഴും മൂർച്ചയുള്ളതു തന്നെ.
ഒരു തവണ കേട്ടാൽ തന്നെ ഓർമ്മയിൽ നില്ക്കുന്ന സ്വഭാവത്തിനു
മാറ്റമൊന്നും സംഭവിച്ചിട്ടില്ല.
പത്തു പതിനഞ്ചു മിനുട്ട് മാത്രം നീണ്ട കൂടിക്കാഴ്ചക്കു ശേഷം
നിറഞ്ഞ മനസ്സോടെ തിരിച്ചിറങ്ങുമ്പോൾ
'റെൻ ആന്റ് മാർട്ടിൻ' ഗ്രാമർ 
പഠിത്തത്തിൽ സ്കൂളിൽ നിന്നു കിട്ടിയ കിഴുക്കിന്റെ ഓർമ്മകളായിരുന്നു
തല നിറയെ.


ചിത്രത്തിൽ : കഥകളി നടനും അദ്ധ്യാപകനുമായ കെ വി കൃഷ്ണൻ നായർ
(മുൻ പ്രിൻസിപ്പാൾ - മൂത്തേടത്ത് ഹൈസ്കൂൾ, തളിപ്പറമ്പ് / വിദ്യാധിരാജ സ്കൂൾ അന്നൂർ, പയ്യന്നൂർ)    

Saturday, 6 July 2013

മഴ..


..തന്റെ കഥ
ഇടയ്ക്കൊന്നു
പറഞ്ഞു നിർത്തിയപ്പോൾ
മിച്ചം വന്നത്. 

Saturday, 11 May 2013

അന്ധത

''കണ്ണിനു കണ്ണ് എന്ന മനോഭാവം ലോകം മുഴുവൻ അന്ധത പടർത്താൻ മാത്രമേ സഹായിക്കൂ''
- ഗാന്ധിജി -

Wednesday, 13 March 2013

മഖന്‍ സിംഗിന്റെ മരണം

കാറ്റ് മൂളിക്കൊണ്ട് വീശുന്നുണ്ടായിരുന്നു. മഖന്‍ സിംഗിന്റെ ഓര്‍മ്മയില്‍ ചൂടുള്ള നീരുറവ തിളച്ചു പൊങ്ങി.
ചെറിയൊരു കുന്ന് നിഴല്‍ വീണു ഇരുണ്ടു കാണപ്പെട്ടു.
അകലെയുള്ള മറ്റൊരു കുന്ന് വെയിലില്‍ അനങ്ങുന്നത് പോലെയും തോന്നി.
കുന്നുകള്‍ക്ക് ജീവനുണ്ടോ?
കുന്നുകള്‍ മരിക്കുമോ?   
പഞ്ചാബില്‍ മനുഷ്യരെ കൊന്നിരുന്നു. ബച്ചന്‍സിംഗ് പറഞ്ഞു, അച്ഛനെ തറിച്ചുതറിച്ചാണ് കൊന്നതെന്ന്. ഈ ബാസ്സിലുള്ളവരെ മുഴുവന്‍ ഞാനും അങ്ങനെ കൊല്ലട്ടെ? ഓ നെഞ്ചു വേദനിക്കുന്നു. ശ്വാസം മുട്ടുന്നത് പോലെ. ബസ്സ്‌ മറിഞ്ഞു വീഴുമോ?...
വീണാല്‍പ്പിന്നെ.. മാധോപ്പൂരില്‍ നിന്നും... രാത്രി എല്ലാവരെയും കുറുക്കന്‍ വലിച്ചു കൊണ്ട് പോകും. ബസ്സ്‌ വീഴില്ല ആകാശത്തില്‍ തങ്ങി നില്‍ക്കുകയാണ് ചെയ്യുക. എന്നിട്ട് ഞാന്‍ ചോദിക്കും - പഞ്ചാബില്‍ നിന്നും വരുന്നവരെ വിശ്വസിക്കാന്‍ കൊള്ളില്ലേ ?
എനിക്ക് വേദനിക്കുന്നു. ഞാന്‍ മരിച്ചുപോകുമെന്ന്..



ലാഹോറില്‍ പോകും. ഞാന്‍ പ്രീതമിനെയും കൂട്ടി ലാഹോറില്‍ പൊയിരുന്നു.. പക്ഷെ..
എനിക്ക് വേദനിക്കുന്നു..              
ഇന്നുച്ചയ്ക്കാണെത്തുക. പക്ഷെ ഞാന്‍ എത്തുകയില്ല. ഡല്‍ഹിയില്‍ എന്റെ ആദ്യത്തെ ഒരാളെയും കാണുകയില്ല. കയ്യില്‍ തഴമ്പു ണ്ടെന്നു പറഞ്ഞു ഞാന്‍ മരിച്ചാല്‍ ലാഹോറില്‍ ഗോതമ്പ് വിളഞ്ഞു നില്‍ക്കുന്നുണ്ടാകും. എനിക്ക് വേണ്ടി ആരെങ്കിലും ഒരിക്കല്‍ ചെറുപ്പത്തില്‍....

തണുക്കുന്നു വല്ലാതെ തണുക്കുന്നു. ഈ കൊര്‍ഡ്രോയ് ട്രൌസര്‍ ലാഹോറില്‍ നിന്ന്...
'ടണല്‍' സമീപിക്കുകയായിരുന്നു.
മഖന്‍ സിംഗിന്റെ ഓര്‍മ്മകള്‍ നിലച്ചു. അയാള്‍ക്ക്‌ വലിയ ക്ഷീണം തോന്നി. ഒരു പ്രവാഹത്തില്‍ പെട്ട് ഒളിച്ചു പോകുകയായിരുന്നു. കാവല്‍ക്കാരന്റെ സിഗ്നലിനു കാത്തുനില്‍ക്കാതെ ബസ്സ്‌ തുരങ്കത്തിലൂടെ കടന്നു പോയി.

മഖന്‍ സിംഗിന് ശ്വാസം മുട്ടി. ഇരുട്ടില്‍ മങ്ങിക്കത്തിയിരുന്ന വിളക്കുകള്‍ വേറെ ഏതോ ലോകത്തിലെ നക്ഷത്രങ്ങളായിരുന്നു.
ബസ്സ്‌ തുരങ്കം കടന്ന ഉടനെ പതുക്കെ നില്‍ക്കുകയും  വാതില്‍ തുറന്നു അയാള്‍ പുറത്തേക്ക് വീഴുകയും ചെയ്തു.
സുന്ദരമായ കാശ്മീര്‍ താഴ്വരയില്‍ വെളിച്ചം ഓളം വെട്ടുകയായിരുന്നു.           

'മഖന്‍ സിംഗിന്റെ മരണം' - ടി പദ്മനാഭന്‍       

Friday, 8 March 2013

അവള്‍

പെണ്ണാണ്,
പോരാത്തതിന് പണവുമില്ല.
കൂലിപ്പണിയെടുത്തും തെരുവില്‍ തുച്ഛ ലാഭത്തിനു സാമാനങ്ങള്‍ വിറ്റും
അനുദിനം 'ഉദാര'മായിക്കൊണ്ടിരിക്കുന്ന ബഹുസ്വര സമൂഹത്തില്‍
അലിഞ്ഞു ചേര്‍ന്നിരിക്കുന്ന ഇവരുടെ പ്രധാന അജണ്ട അന്നന്നത്തെ അന്നം തന്നെ.
ചാനല്‍ വര്‍ത്തമാനങ്ങളില്‍ ജ്വലിക്കാന്‍ ഇവര്‍ക്ക് അറിയില്ല.
ആര്യ കൂവിയതോ നിര്‍ഭയ പൊലിഞ്ഞു പോയതോ കോടതിയുടെ 'വിശാഖ' ഉത്തരവുകളോ
ഒന്നും ഇവരെ ബാധിക്കുന്ന വിഷയമേ അല്ല.

'സ്വതന്ത്ര'യായിട്ടും 'സുരക്ഷിത'യല്ലാതായ,
'നിര്‍ഭയ'യായിട്ടും  'നിസ്സഹായ'യാകുന്ന
അവള്‍ക്കുള്ള  നെടുവീര്‍പ്പുകളുമായി
വീണ്ടുമൊരു 'വനിതാദിനം'

ആധുനികരെന്നു അവകാശപ്പെടുമ്പോഴും ഇന്നും നമുക്കിടയില്‍ 
മതവും കുടുംബവും സദാചാരവും ചാരിത്ര്യവും
എല്ലാം അവള്‍ക്കെതിരെ തരാതരം ഉപയോഗിക്കാനുള്ള

ആയുധങ്ങള്‍ മാത്രം

Thursday, 26 July 2012

ചെറുമഴക്കാലം

പെരുമഴ കൂടാതെ കര്‍ക്കിടകം 10 ഉം കഴിയുന്നു..

എത്ര മഴയേറ്റിട്ടും അലിവില്ലാതായിപ്പോകുന്ന
മലയാളിയോടുള്ള പരിഭവം പോലെ .....

 മഴയുടെ ഒളിച്ചു കളി ഇനിയും മാറുന്നില്ല...


 വരുതിയുടെ ദിനങ്ങള്‍ക്കായി  കരുതിയിരിക്കാനുള്ള ഓര്‍മ്മപ്പെടുത്തലുമായി
മലയാളത്തിനിത് ചെറുമഴക്കാലം..!

Saturday, 30 June 2012

സര്‍ഗാത്മകത



വസ്തു സാക്ഷാത്കാരത്തിന്, ഉള്‍ക്കാഴ്ച്ചയ്ക്ക്, അടിസ്ഥാനം എന്ത്?
 
ലോകം കാണുകയും ശാസ്ത്രം പഠിക്കുകയും അന്യരുടെ കലാ സൃഷ്ടികള്‍ ആസ്വദിക്കുകയും അഭ്യസിക്കുകയും ആണോ? ഇവ ഓരോന്നും കലാ ജീവിതത്തെ പുഷ്ടിപ്പെടുത്തുമെങ്കിലും അതിന്റെ നിയാമാകമായ ശക്തി ഇവയല്ല. എല്ലാ പര്യടനപ്രിയരും പണ്ഡിതന്മാരും ഗ്രന്ഥ പാരായണക്കാരും കലാകാരന്മാരായിട്ട് നാം കാണാറില്ല. സാക്ഷാല്‍ക്കാരത്തിന്റെ ശരിയായ അടിസ്ഥാനം ശക്തിയാണെന്നു മമ്മടഭട്ടനും പ്രതിഭയാണെന്ന് ജഗന്നാഥ പണ്ഡിതരാജനും ജീനിയസ് ആണെന്ന് ഹെര്‍ബര്‍ട്ട് റീഡും പറയുന്നു. കാട്ടാളന്‍ (വാല്മീകി) ആദികാവ്യം സൃഷ്ടിക്കുകയും കുരുടന്‍ (മില്‍ട്ടന്‍) ഇതിഹാസങ്ങള്‍ രചിക്കുകയും ചെകിടന്‍ (ബീഥോവന്‍) വിമോഹനഗാനങ്ങള്‍ ആലപിക്കുകയും ചെയ്ത കഥകള്‍  വായിക്കുമ്പോള്‍ നാം മമ്മടാദികളെ വിശ്വസിച്ചു പോകുന്നു.

നിഗൂഡവും നിസ്സര്‍ഗസിദ്ധവും നിര്‍മ്മാണത്വരമാണവുമായ ഒരു കിഴിവിനെയാണ് അവര്‍ ശക്തി മുതലായ പദങ്ങളാല്‍ ഉന്നം വെയ്ക്കുന്നത്. ഒരു കാവ്യം രചിക്കുകയാണെങ്കില്‍, കവിയുടെ ഉള്ളിലുള്ള വസ്തുവിഷയകമായ ഭാവത്തെ ഏറ്റവും സമഞ്ജസമായി ഉന്മീലനം ചെയ്യത്തക്കവണ്ണം അതിലെ പദങ്ങളും വൃത്താലങ്കാരാദികളും യോജിച്ചു പ്രവര്‍ത്തിക്കുവാന്‍ വെറും ലോകാവലോകനമോ ശാസ്ത്ര പാണ്ഡിത്യമോ കാവ്യാനുശീലനമോ രചനാഭ്യാസമോ ഇവയുടെ ഒത്തൊരുമയോ ഉണ്ടായാല്‍ പോരാ മറ്റൊന്ന് കൂടി വേണം. അതുണ്ടായാല്‍ കാവ്യഘടനയ്ക്കനുകൂലമായ നിലയില്‍ ശബ്ദാര്‍ത്ഥങ്ങള്‍ ഉപസ്ഥിതി ചെയ്തുകൊള്ളും. ഇല്ലെങ്കില്‍ കവിതയുടെ സാമ്രാജ്യത്തില്‍ അര്‍ത്ഥനാശമായിരിക്കും ഫലം.

കാവ്യവൃത്തത്തെ നിര്‍മ്മിക്കുന്നത് കവിയുടെ പ്രതിഭയാകുന്ന കേന്ദ്രവും ദര്‍ശനമാകുന്ന പരിധിയുമാണ്; അതിനുള്ളിലുള്ള പദ-വാക്യ-ചഛന്ദസ്സ് - അലങ്കാരാദികളുടെ കൊച്ചു 'ചതുരത'കളല്ല. പ്രതിഭയും ദര്‍ശനവുമില്ലാത്ത കവി ഉറവും ഒഴുക്കുമില്ലാത്ത നദി പോലെ ദയനീയനാകുന്നു.

'ദര്‍ശനവും ആവിഷ്കരണവും' എന്ന വിഷയത്തില്‍ സുകുമാര്‍ അഴീക്കോട് ('ആശാന്റെ സീതാകാവ്യം')           

Saturday, 5 May 2012

22 ഫീമെയില്‍ കോട്ടയം

ടെസ്സയെയും സിറിളിനെയും ഇന്നലെയാണ് കണ്ടത്:
"അന്ധകാരത്തില്‍ വെള്ളിടിയേറ്റു
വെന്തെരിയും മരങ്ങള്‍ നാം
വ്യോമസീമയില്‍പ്പാഞ്ഞുപോകുന്ന
ധൂമകേതുക്കളാണു നാം
ഇന്നൊരേ ദുര്‍വിധിയുടെ കയ്യില്‍
മിന്നുമമ്പിന്‍ മുനകള്‍ നാം.

ഇന്നൊരേ കയ്യിലെക്കടിഞ്ഞാണില്‍
നമ്മള്‍ രണ്ടു കുതിരകള്‍
ഒറ്റലാടത്തിനാല്‍ക്കുതിപ്പിച്ചു
വിട്ട രണ്ടു കുതിരകള്‍

ഏക ദൃശ്യത്തെയുറ്റുനോക്കുന്ന
മൂകമാം രണ്ടു കണ്ണുകള്‍
സ്വപ്നമൊന്നിനെസ്സംവഹിക്കുവാന്‍
നീര്‍ത്ത രണ്ടു ചിറകുകള്‍
നിത്യ സൌന്ദര്യം നിദ്രകൊള്ളുന്ന
ഭദ്രമാം കല്ലറയ്ക്കുമേല്‍
ദുഖസാന്ദ്രമാം കണ്ണുകളോടെ
കാത്തിരിക്കുമാത്മാക്കള്‍ നാം.

ചുണ്ടുകള്‍ കൊണ്ടൊരേ രഹസ്യത്തെ-
പ്പങ്കിടുന്നവരാണു നാം
തോറ്റു തമ്മില്‍ക്കടങ്കഥയാകു -
മൊറ്റ വേതാളമാണു നാം.

വാസ്തവത്തിലൊരേ കുരിശിന്റെ
നീര്‍ത്തിയ രണ്ടു കൈകള്‍ നാം"
[യോചിസ്ലാവ് ഇവാനോവ്  - 'പ്രണയം' (1901) വിവര്‍ത്തനം : ചുള്ളിക്കാട്  ~ മാതൃഭൂമി ആഴ്ചപ്പതിപ്പ് - 90:08]

വെറുമൊരു പെണ്ണായ ടെസ്സ തന്റെ വല മുറിച്ചു കടന്നപ്പോള്‍ വീണ തുള പുരുഷ പ്രേക്ഷകന്റെ ഇന്നോളമുള്ള ഗര്‍വ്വിനു മീതെയാണ്. പെണ്ണിന് ആത്യന്തികമായി നഷ്ടപ്പെടാന്‍ ഒന്നുമില്ലെന്നും ഒറ്റ ലാടത്തില്‍ കുതിപ്പിച്ചു വിട്ട കുതിരകളില്‍ തോറ്റത് താന്‍ മാത്രമാണെന്നും പാവം തിരിച്ചറിഞ്ഞു.
ക്യാനഡയിലുള്ള അവളോട് ഇപ്പോഴൊരുപക്ഷേ വരിയുടക്കപ്പെട്ട സിറിളിനു പ്രണയം തോന്നിത്തുടങ്ങിയിട്ടുണ്ടാകും !!   

Sunday, 15 April 2012

കണ്വ കന്യ


"വെണ്‍നര കലര്‍ന്നവളല്ല നീയെന്‍ കണ്ണിന്നു
'കണ്വമാമുനിയുടെ കന്യ'യാമാരോമാലാള്‍;
പൂനിലാവണിമുറ്റമല്ലിതു, ഹിമാചല സാനുവിന്‍
മനോഹര  മാലിനീ നദീതീരം.

വ്യോമമല്ലിത്  സോമ താരകാകീര്‍ണ്ണം, നിന്റെ
യോമന വനജ്യോത്സ്ന പൂത്തുനില്‍ക്കുവതല്ലോ
നിഴലല്ലിത് നീളെ പുള്ളിയായ് മാഞ്ചോട്ടില്‍ നിന്നിള -
മാന്‍ ദീര്‍ഘാപാംഗന്‍ വിശ്രമിക്കുകയത്രേ!

പാടുക സര്‍വാത്മനാ ജീവിതത്തിനെ സ്നേഹി-
ച്ചീടുവാന്‍ പഠിച്ചോരീ  നമ്മുടെ ചിത്താമോദം
ശുഭ്രമാം തുകില്ത്തുമ്പില്‍ പൊതിഞ്ഞു സൂക്ഷിക്കുമീ-
യപ്സരോവധു തിരുവാതിര തിരിക്കവേ.

നാളെ നാം നാനാതരം വേലയെക്കാട്ടും പകല്‍ -
വേളയില്‍ ക്ഷീണിച്ചോര്‍മ്മിച്ചന്തരാ ലജ്ജിക്കുമോ?
എന്തിനു? മര്‍ത്യായുസ്സില്‍ സാരമായതു ചില
മുന്തിയ സന്ദര്‍ഭങ്ങള്‍, അല്ല മാത്രകള്‍ മാത്രം.

ആയതില്‍ ചിലതിപ്പോള്‍ ആടുമീ ഊഞ്ഞാലെണ്ണീ
നീയൊരു പാട്ടും കൂടി പാടിനിര്‍ത്തുക പോകാം."

-- 'ഊഞ്ഞാലില്‍'  : വൈലോപ്പിള്ളി --

Thursday, 3 November 2011

താരുണ്യം

"കാലം കുറഞ്ഞ ദിനമെങ്കിലും അര്‍ത്ഥ ദീര്‍ഘം.....!!"

Thursday, 20 October 2011

കാക്കനാടന് *

---- ഒടുവില്‍ ലഹരി മാഞ്ഞപ്പോള്‍ മുറുകെ പിടിച്ചിരുന്ന കൈകള്‍ അയഞ്ഞപ്പോള്‍ അവള്‍ പിടഞ്ഞെഴുന്നേറ്റു. അവള്‍ സംതൃപ്തിയുടെ മന്ദഹാസത്തോടെ പറഞ്ഞു - "നന്ദി"

എനിക്ക് ചിരി വന്നു. അവള്‍ വസ്ത്രങ്ങള്‍ ധരിക്കുക ആയിരുന്നു. ഞാനുമെണീറ്റ് വസ്ത്രങ്ങള്‍ ധരിക്കാന്‍ തുടങ്ങി. ഇപ്പോള്‍ ഇവള്‍ ഒരു സാധാരണ സ്ത്രീ ആയിട്ടുണ്ടാകും. ഞാന്‍ സന്തോഷിച്ചു. കിടക്കയിലിരുന്നു കമ്പിളി സോക്ക്സ് കാലില്‍ വലിച്ചു കയറ്റവേ ഞാന്‍ പറഞ്ഞു:

"നീ സുന്ദരിയാണ്; നിന്നെ ഞാന്‍ മറക്കില്ല"
അവള്‍ മറുപടിയൊന്നും പറഞ്ഞില്ല. അമ്പടി തോറ്റിരിക്കുന്നു അല്ലേ? എന്നിട്ടും തോല്‍വി സമ്മതിക്കാന്‍ വയ്യ അതല്ലേ മിണ്ടാതിരിക്കുന്നത്?

അവളുടെ നിശബ്ദത തന്ന ധൈര്യത്തില്‍ ഞാന്‍ ചോദിച്ചു:
"നിന്റെ പേരെന്താ?"
എന്നില്‍ അത്ഭുതം സൃഷ്ഠിക്കുമാറ് സ്വരം കടുപ്പിച്ച് അവള്‍ പറഞ്ഞു:
"അത് പ്രധാനമല്ല"

അമ്പരപ്പ് ഒളിപ്പിച്ചു വെച്ച ഞാന്‍ ചിരിച്ചു. തുടര്‍ന്നു ചോദിച്ചു:
" എന്റെ പേര് അറിയണമെന്നില്ലേ? "
"വേണ്ട" അവളുടെ ശബ്ദം കുറെക്കൂടെ കടുത്തു. "അതും പ്രധാനമല്ല. നിങ്ങള്‍ ആവശ്യമില്ലാത്ത കാര്യങ്ങള്‍ സംസാരിക്കുന്നു. നിങ്ങള്‍ എന്നെ 'നീ' എന്നു സംബോധന ചെയ്തത് തെറ്റാണ്" അവളുടെ ശബ്ദത്തിന്റെ കാഠിന്യവും വ്യാപ്തിയും ഏറിക്കൊണ്ടിരുന്നു.

അവള്‍ തുടര്‍ന്നു " ഞാന്‍ നിങളുടെ സ്നേഹിത അല്ല, നീയെന്നു വിളിക്കുന്നത് കൂട്ടുകാരെയാണ്"
ആ വാക്കുകള്‍ എന്നെ അമ്പരപ്പിച്ചു. നീയെന്ന സംബോധന ജര്‍മ്മനിയില്‍ അടുപ്പത്തെ കാണിക്കുന്നതാണ് . ഇതില്‍ കവിഞ്ഞ അടുപ്പമുണ്ടോ?

ഞാന്‍ അമ്പരന്നു നിന്നപ്പോള്‍് അവള്‍ ശബ്ദമുയര്‍ത്തി തുടര്‍ന്നു: "ഇത് ഭ്രാന്താണ്, നമ്മള്‍ ഈ കാട്ടിക്കൂട്ടിയത്. ഞാന്‍ ഭ്രാന്തി ആയത്കൊണ്ടാണ് നിങ്ങളെയിങ്ങോട്ട് കൂട്ടിക്കൊണ്ടു വന്നത് . ഇത് ഭ്രാന്താണ്, പാപമാണ്, നിങ്ങള്‍ക്ക് വേണ്ടത് കിട്ടിയില്ലേ? ഇനി പോകരുതോ?"

അപ്പൊളേക്ക് അവളുടെ ശബ്ദം ഏതാണ്ട് അലര്‍ച്ചയൊടടുത്തിരുന്നു. അവളുടെ കഴുത്തിലെ ഞരമ്പുകള്‍ തുറിച്ചു. കണ്ണുകളില്‍ കോപം കിടന്നു തിളച്ചു.

ഞാന്‍ പരിഭ്രമിച്ച് എഴുന്നേറ്റു.
അവള്‍ സ്വീകരണ മുറിയിലേക്ക് കടന്നു ലൈറ്റിട്ടു. വാര്‍ഡ്രോബ് തുറന്നു എന്റെ ഓവര്‍കോട്ട് എടുത്ത് അവള്‍ അത് എന്റെ നേരെ എറിഞ്ഞു തന്നു. "പോകാന്‍ പറഞ്ഞില്ലേ, കടക്ക് പുറത്ത്" അവള്‍ അലറി.

ഞാന്‍ ഓവര്‍കോട്ടിടുമ്പോഴും അവള്‍ ഉച്ചത്തില്‍ ശപിച്ച്കൊണ്ടിരുന്നു. ഞാന്‍ പുറത്തിറങ്ങിയ നിമിഷത്തില്‍ അവള്‍ വാതില്‍ കൊട്ടിയടച്ച് തഴുതിട്ടു. പരിഭ്രാന്തിയോടെ ഞാന്‍ ഇറങ്ങി നടന്നു. ഡിസംബറിലെ മഞ്ഞില്‍ രാത്രിയുടെ ഇരുട്ടില്‍ നഗരം ചത്തു മരവിച്ചു കിടന്നു. ---
(
ഭ്രാന്ത് : കാക്കനാടന്‍ )

*പുതിയ ഭാവുകത്വത്തില്‍ എഴുതാന്‍ മലയാളിയെ ശീലിപ്പിച്ചതിനു, ഭ്രാന്തുകളുടെ കുളിര്‍മക്ക്

Wednesday, 27 April 2011

എന്ത് നിന്‍ ഗന്ധം

"നിന്നെ തിരയുമെന്‍ ദൂതനാം കാറ്റിനോടെന്തേ
നിന്‍ ഗന്ധമെന്നോതിടേണ്ടൂ?"
~ ഒ എന്‍ വി ~

Monday, 25 October 2010

സൗന്ദര്യ ലഹരി

"ധനു:പൌഷ്പം മാര്‍വീ മധുകരമയീ പഞ്ചവിശിഖാ
വസന്തസ്സാമന്തോ മലയമാരുതായോധനരധഃ
തധാപ്യേകസ്സര്‍വ്വം  ഹിമഗിരി സുതേ! കാമപി കൃപാ-
മപാംഗാത്തേ ലബ്ധ്വാ ജഗദിദമനംഗോ വിജയതേ"

ശങ്കരാചാര്യരുടെ 'സൗന്ദര്യ ലഹരി' യിലെ 'വിഷയ' വ്യാപ്തിക്കു ആശാന്റെ തര്‍ജ്ജമ ഇങ്ങനെ:

"ഒക്കെ പൂവാണ് വില്ലും, ശരമത് വെറുമ-
ഞ്ചാണു, വണ്ടാണ്‌ ഞാണും
തെക്കന്‍ കാറ്റാണ് തേരും, സുരഭിസമയമൊ-
ന്നാണ് കാണും സുഹൃത്തും
നിൽക്കട്ടേകാകിയാണെങ്കിലുമയി ഗിരിജേ
നിന്‍ കടാക്ഷത്തിലേതോ
കയ്ക്കൊണ്ടും കൊണ്ടനംഗന്‍ ഭുവനമഖിലവും
നിന്ന് വെല്ലുന്നുവല്ലോ"